Puisi Andre GB

SEBUAH JAWAB

tadi malam aku ingat lagi
pertanyaanmu dulu yang tak sempat aku jawab
..............
kini aku tahu
di mana ku taruh hatiku
hingga aku sering tak berperasaan
...............
(hatiku ada dalam genggammu)

SAJAK FOR MASA DEPAN

Kalo nanti ngoni so nyanda dapa lia pante,
Tanya jo pa pemerenta
So dorang yang da tambung tu pante
Kong ganti deng tu mol-mol

Kalo nanti ngoni so susa mo bli baju
Ngoni tetap tanya pa pemerenta
Karna dorang yang user pulang
Tu uti-uti yang dulu di 45

Kalo nanti ngoni so nyanda bole skola
Itu musti tanya pa pemerenta
Karna dorang no yang beking tu skola
Jadi lebe mahal tiap hari

Kalo nanti ngoni so susa mo brobat di ruma saki
Ngoni tetap musti tanya pa pemerenta
Karna dorang pe tau-tau itu
Beking harga oba mahal pe nene moyang

Kalo nanti ngoni so nyanda dapa rasa cap tikus
Ngoni tanya komang pa polisi
Karna dorang larang tu minuman adat
Mar dong se biar tu minuman segel

Kalo nanti ngoni demo kong dapa pintuas
Ngoni tanya le pa polisi
Kiapa ngoni dong pintuas
Kong tu koruptor dong se lapas?

Kalo ngoni biar nda sala mar dapa tilang
Ah.... itu tanya le pa polisi
Karna memang so dorang pe kalakuang
Tukang ba pajak lantarang pake seragam

Kalo ngoni dosen minta akang doi
Tanya pa dekan ato rektor
Dorang pe mata buta ato nyanda?
Kiapa ni kampus so fol deng tukang pajak?

Kalo ngoni dapa larang jadi kritis
Co ngoni tanya pa dekan ato rektor
Dorang ada ontak ato nyanda?
Kiapa ja larang orang mo jadi lebe pintar?

Kalo ngoni maitua se putus
Itu komang ngoni musti tanya pa diri sandiri
Sapa tau, maitua da se tinggal pa ngana
Karna memang ngana bisae!
He.... he.......




SEPENGGAL JAZZ UNTUK KENANGAN

(untuk semua yang telah bersama-sama bekerja)

Di lante tiga Ge pe ruma
Qta nyanda mo lupa torang mulai ni samua
Cuma modal baku parcaya
Padahal dompet kosong samua

Di lante tiga Ge pe ruma
Torang bakumpul sampe pagi
Yang penting ada surya deng kopi
Kong baku abis bicara visi

Di lante tiga Ge pe ruma
Tiga buku buka jalang
Se tau pa banya orang
Pemai! Torang nyanda cuma badiang!